Media Coverage

囝囝難捨玩具捐社企 陳慧琳:用盡方法o氹佢哋

27/9/2017

  【蘋果日報】陳慧琳 (Kelly)今日到九龍塘生產力促進局支持社企活動,第五年同機構合作,幫助弱勢社群,Kelly話社企現時開設唔同店舖,玩樂飲食服務均有,Kelly會幫襯買曲奇。

Kelly話佢諗住兩個仔一齊做善事,將佢哋啲玩具捐出去,點知佢哋兩個都唔捨得,唯有用盡方法o氹佢哋,Kelly仲話試過偷偷攞囝囝玩具去捐被發現,最後Kelly解釋俾兒子聽,攞去俾啲冇玩具玩嘅小朋友,好彩佢哋都接納。Kelly希望日後帶同小朋友做義工,笑言:「不過真係要幫到手,唔係淨係出嚟影相。」

講到大仔劉昇嘅小學生活,Kelly話:「估唔到大仔好獨立,自動自覺做功課,最初都擔心,所以o依家我得閒咗,多時間照顧細佬。」問到Kelly會唔會要求小朋友科科A?佢話:「要求都冇可能發生,男仔始終顧住玩,我最緊要知佢明唔明白內容,理解如果因大意失分可接受,暫時阿仔嘅數學同科學比較強。」

More